Париж-2024: Жоламан Шаршенбеков алгачкы атаандашын жеңди

Бүгүн, 5-августта Париж шаарында өтүп жаткан жайкы Олимпиада оюндарында күрөш боюнча мелдештер башталды.

Бүгүнкү мелдеште кыргыз балбаны Жоламан Шаршенбеков дагы килемге чыкты. Ал 1/8 финалда коңшу казакстандык Айдос Султангали аттуу балбан менен кез келди.

Биринчи эле казак балбаны Жоламандын артына өтүп 2 упай алды. Буга башкы машыктыруучу Азат Эркимбаев макул болбой, "челленж" баскычын басты. Видео кайталоону көргөн калыстар казак балбаны буттан кармап жыкканын көрүп, 2 упайды кайра алышты, эсеп 0:0.

Көп өтпөй калыс казак балбанын партерге койду. Андан Жоламан Шаршенбеков дагы, атаандашы дагы 2ден упай алышты, эсеп 2:2.

Экинчи бөлүк башталары менен казак балбаны Жоламанды килемден түртүп чыгарып, дагы бир упай алды. Андан кийин Жоламан атаандашынын артына 2 өтүп, 4 упай алды, эсеп 6:3.

Калган бөлүктө балбандар эсеп санын өзгөртө албай, Жоламан Шаршенбеков 6:3 эсебинде жеңишке жетти.

Муну менен Жоламан Шаршенбеков Олимпиада оюндарынын чейрек финалына чыкты.