Бишимбаевдин иши Жогорку сотко жөнөтүлдү

Аялын өлтүргөн деп соттолгон Куандык Бишимбаев жазасын жеңилдетүү үчүн күрөшүн улантууда. Бул тууралуу казак басылмалары жазышууда.

Жогорку соттун маалыматында Куандык Бишимбаев менен Бахытжан Байжановдун иши кечээ, 5-августта Жогорку сотко өткөндүгү жазылган.

Эске салсак, Салтанат Нукенованын жансыз денеси 2023-жылдын 9-ноябрында Астана шаарындагы "BAU" ресторанында табылган. Аны сабап өлтүрүүгө шектелип күйөөсү, мурдагы экономика министри Куандык Бишимбаев кармалган. Ага Казакстандын Кылмыш-жаза кодексинин 110-беренеси (Кыйноо), 99-беренеси (Өтө мыкаачылык менен адам өлтүрүү) жана 14-беренеси (Өтө оор кылмыштын кайталанышы) боюнча айып тагылган.

Ага байланыштуу, 13-майда Куандык Бишимбаев келинчеги Салтанат Нукенованы өлтүргөн деп айыпталып, 24 жылга эркинен ажыратылган. Мурдагы аткаминер жазасын күчөтүлгөн тартиптеги түзөтүү абагында өтөйт.