Мээрим Жуманазарова пьедесталга чыкканда көзүнө жаш алды (видео) 

Бүгүн, 7-августка караган түнү Париж шаарында кыз-келиндер арасындагы күрөш боюнча медаль уткан балбандарды сыйлоо аземи өттү.

Анда Олимпиада пьедесталына күмүш байге уткан Мээрим Жуманазарова дагы чыгып, Кыргызстандын туусу Олимп оюндарында экинчи ирет көтөрүлдү. Сыйлоо аземи учурунда медаль алып жатып, кыргыз балбаны көзүнө жаш алды.

Белгилей кетсек, Олимп оюндарында Мээрим Жуманазарова кыз-келиндер арасындагы күрөш боюнча мелдештин финалында америкалык Эмит Элор менен беттешти. Ал атаандашынан 0:3 эсеп менен жеңилип калды.

Парижде өтүп жаткан Олимпиадада Мээрим Кыргызстандын куржунуна алгачкы күмүш медалды алып келди.

Ал Токиодо өткөн Олимп оюндарында коло медаль утуп алган. Бул күнгө карата Олимпиада оюндарында эки жолу медаль алган алгачкы спортчу болду. Эми алдыда чыга турган балбандарыбыздан да үмүт артып туралы.