Париж-2024: Бүгүн Кыргызстандан кайсы спортчулар күч сынашат?

Бүгүн, 8-августта Парижде өтүп жаткан Олимпиада оюндарында Кыргызстандан үч спортчу күч сынашат.

Балбан Амантур Исмаилов Бишкек убактысы боюнча саат 15:00дө грек-рим күрөшү боюнча 67 килограммга чейинки салмак ченинде коло медаль үчүн күрөшүүгө мүмкүнчүлүк бере турган көңүл жубатуучу беттешке чыгат. Анда Исмаилов сербиялык Мате Немеш менен күрөшөт, аны утса коло байге үчүн азербайжандык Хасрат Жафаров менен кез келет.

Ал эми Бекзат Алмаз уулу эркин күрөш боюнча мелдешке 57 килограммга чейинки салмак ченинде катышат. Ал 1/8 финалда казакстандык Мейрамбек Картбай менен күрөшөт. Таймаштар саат 15:30да башталат.

9-августка караган түнү бокс боюнча мелдеш башталып, Бишкек убактысы боюнча саат 01:30да орун алат. Анда мушкер Мунарбек Сейитбек уулу 57 килограммга чейинки салмак ченинде финалга чыгуу үчүн болгариялык Хавьер Ибанес Диас менен беттешет.