Парижде Кыргызстандын бокс федерациясынын президенти сыйлоо аземине катышты

Париждеги Жайкы Олимп оюндарында мушкер Мунарбек Сейитбек уулуна сыйлык тапшыруу аземине Кыргызстандын бокс федерациясынын президенти – Улуттук олимпиада комитетинин президентинин кеңешчиси Умбеталы Кыдыралиев катышып, медаль такты. Бул туурасында бүгүн, 11-августта Министрлер кабинетинин telegram-каналы билдирди.

Уюштуруучулардын бул кадамга барышына Мунарбек Сейитбек уулунун күмүш медаль алышы түрткү болгондугу белгиленген.

“Улуттук олимпиада комитетинин президенти Садыр Мамытовдун өтүнүчү менен Оюндарды уюштуруу комитети сыйлыктарды тапшырууга Эл аралык олимпиада комитетинин мүчөлөрү гана катыша турган эрежеден четтеп кетти. Бул ошондой эле Олимпиада оюндарынын тарыхында биринчи жолу Кыргызстандын мушкеринин медалга ээ болушуна байланыштуу болду”, - деп белгиленген маалыматта.