"Жылуу сөздөрдү окудум". Эрлан Шеров Париж Олимпиадасынан кийин билдирүү жасады

Кыргыз дзюдочусу Эрлан Шеров Instagram баракчасы аркылуу Парижде өткөн Олимпиада оюндарында аны колдогондорго ыраазычылыгын билдирди.

"Өлкөмдү жогорку дүйнөлүк деңгээлде көрсөтүү мүмкүнчүлүгүнө ээ болуу мени кубандырат. Мен оюндарга чейин жана андан кийин мага жөнөтүлгөн көптөгөн жылуу жана күчтүү сөздөрдү окудум. Мени ар кандай кырдаалда колдогонуңуздар үчүн чоң рахмат.

Биздин федерацияга, курама командага жана ошондой эле машыктыруучуларга ыраазычылык билдирем! Күндө эртең менен-кечинде чогуу машыгып, жакын адамдардан болуп калдык. Желегибизди көтөрүү, тарыхты жазуу жана жакшы эстеликтерди калтыруу боюнча биргелешкен аракеттерибиз мени кандай гана болбосун алдыга жылууга шыктандырып, түрткү берет. Ар дайым жанымда болуп, ушул жолдо мени колдоп келген үй-бүлөмө, ата-энеме, туугандарыма жана досторума чоң таазим", - деп жазган ал.

Белгилей кетсек, Шеров Олимп оюндарына дзюдо боюнча катышкан. Ал 1/16 финалындагы кубалык атаандашын жеңип алса, 1/8де испаниялыкка жеңилип калып, жүрүшүн жыйынтыктаган.