Садыр Жапаров Олимпиадага катышкан 16 спортчунун ар бирине унаа берди

Бүгүн, 13-августта Парижде өткөн Жайкы Олимпиада оюндарына катышкан спортчулар өлкөгө кайтып келишти.

Аларды тосуп алуу аземи учурда Бишкектеги Турдакун Усубалиев атындагы аянтта (эски аянт) уланууда.

Салтанатка президент Садыр Жапаров келип, спортчулар жана алардын машыктыруучулары кызыл килемден өтүштү.

Анда Олимпиадага катышкан 16 спортчунун ар бирине унаа берилди.

Ошондой эле күмүш байге алган Мээрим Жуманазарова менен Мунарбек Сейитбек уулуна 10 миллион сомдон берилди.

Ал эми коло медалга ээ болгон Акжол Махмудов, Айсулуу Тыныбекова, Жоламан Шаршенбеков жана Үзүр Жузупбековго 7 миллион сомдон берилди.

Калган спортчуларга 1 миллион жана 500 миң сомдон тапшырылды.