Чолпон-Атадагы "Рух-Ордону" дагы сел каптады (фото)

Кечээ, 13-август күнү кечинде Чолпон-Ата шаарында сел жүрүп, ал "Рух-Ордо" маданий борборун дагы каптады. Бул тууралуу Өзгөчө кырдаалдар министрлигинен билдиришти.

Маалыматка ылайык, кокту-колоттордон келген сел суусу шаардагы 1 дүкөндүн, 7 турак жайдын короосуна жана Чыңгыз Айтматов атындагы "Рух-Ордо" маданий борборун каптаган. Ошондой эле Бактуу-Долоноту айылындагы бир турак үйдүн жертөлөсүнө суу кирген.

Таң эрте Өзгөчө кырдаалдар министри Бообек Ажикеев башында турган 46 куткаруучу "Рух-Ордо" маданий борборун тазалоого киришкен.

Жеринде Жарандык коргонуу кызматынын 2 инженердик техникасы тартылган.

Борборду ыкчам тазалоо максатында кошумча күч катары ӨКМдин дагы 75 куткаруучусунун жана техникалардын тартылуусу күтүлүүдө.