Армения Эл аралык Олимпиада комитетинен алтын медаль талап кылды

Армениянын Улуттук Олимпиада комитети Париждеги Олимпиада оюндарында балбан Артур Алексаняндын беттеши боюнча Эл аралык Олимпиада комитетинин Апелляциялык комиссиясына арыз менен кайрылды. Бул тууралуу армениялык басылмалар жазышты.

Финалдык беттеште башкы фаворит болгон Артур Алексанян ирандык Мохаммад Хади Саравиге утулуп калган.

"Эл аралык күрөш федерациясы калыстар туура чечим чыгарган деп кат түрүндө жооп берди. Биздин 100 пайыз туура экенибиз бул чындык. Армениянын Улуттук олимпиада комитети Армениянын Күрөш федерациясынын кайрылуусун жана Эл аралык күрөш федерациясынын жообун тиркеп, ЭОКтун Апелляциялык комитетине кайрылды.

Олимпиадалык оюндарда күрөштүн башка түрлөрүндө ушундай эле жагдайларга такыр тескери мамиле кылган учурлар болгон. Артур Алексаняндын бул күрөштө утулбай турганына биз көбүрөөк ишенебиз. Апелляциялык комиссия чечсин. Биз алтын медалыбызды акырына чейин талап кылабыз", - деген Армениянын спорт министри Карен Гилоян.