Трамп Путин менен мамилени жакшыртуу каалоосун билдирди

АКШнын экс-президенти жана Республикалык партиядан өлкө башчылыгына талапкер Дональд Трамп Илон Маск менен болгон маегинде Кытай, Орусия жана Түндүк Кореянын лидерлери Си Цзиньпин, Владимир Путин жана Ким Чен Ын менен мамилени жакшыртууга үмүттөнөрүн билдирди.

Трамп белгилегендей, бул лидерлер менен мамилени жакшыртуу максатка ылайыктуу, анткени дүйнө үчүн эң чоң коркунуч глобалдык жылуулук эмес, өзөктүк согуш.

Экс-президент шайлоодо жеңип чыкса, “Иранга эч кандай жамандык кылбайм” деп өзүнчө тактады. Трамптын тушунда Вашингтон менен Тегерандын мамилеси эң төмөнкү чекке жеткен – ал АКШны 2015-жылкы өзөктүк келишимден чыгарып, Иран мунайына санкция киргизген.

Саясатчы ошондой эле АКШнын президенти Жо Байден Путинге туура эмес белги берип, дүйнөнү үчүнчү дүйнөлүк согушка жакындатканын айтып, азыркы администрацияны Украинада согуш жаратты деп кайрадан айыптады. Ошондой эле ал Ак үйдү Израил менен Палестинанын ортосунда согуш баштаганы үчүн айыптады, бул Израилдин Газага басып киришине жана 40 миң палестиналыктын өлүмүнө алып келди.