Баткенде жергиликтүү бийлик 90 жаштагы энеге үй куруп берди

Баткенде жетекчилердин биргелешкен аракети менен 90 жаштагы энеге үй курулду. Бул тууралуу бүгүн, 15-августта президенттин Баткен облусундагы өкүлчүлүгүнөн билдирди.

Маалыматка ылайык, 90 жаштагы Ташбүбү Абилова 54 жаштагы ден соолугунан майыптыгы бар кызы менен туруктуу жашаган жайы жок айылдагы бош үйлөрдүн биринде баш калкалап келген.

Эненин жашоо шарты тууралуу маалыматтар социалдык тармактарда жарыяланып, жергиликтүү бийликке да маалым болгон.

Эне баланын тагдыры боюнча маалымат алган облус башчысы Абдикарим Алимбаев мындан эки ай мурда аларга турак жай курууну колго алган. Алгач облус башчысынын тапшырмасына ылайык, апанын кызы Тажигүл Абиловага Баткен районунун Кара-Бак айыл аймагынын Алты-Адыр айылынан турак жай салуу үчүн 10 сотых жер участогу бөлүнүп берилген.

Алимбаевдин үй куруу демилгесин Баткен облустук мекеме-ишканаларынын жетекчилери колдоп, ыктыярдуу салым кошушкан. Натыйжада эки ай аралыгында үч бөлмөлүү заманбап, бардык шарты бар үй курулуп бүттү. Баткен облусундагы өкүлчүлүктүн аппаратынын кызматкерлери үйдү турмуш тиричиликке керектүү буюмдар менен толуктаган.

"Бүгүн турак үйдү ээлерине салтанаттуу тапшыруу аземи өттү. Ага Абдикарим Алимбаев баш болгон жетекчилер, мамлекеттик кызматкерлер, айыл тургундары катышты. Облус башчысы Ташбүбү апага үйдүн ачкычын тапшырып, ак өргөсү менен куттуктап,узак жана бакубат жашоо каалады. Ташбүбү эне турак үйдү курууга салым кошкон жарандарга ыраазычылык билдирип,чексиз бактылуу экенин билдирди", - деп айтылат маалыматта.