Путин Азербайжанга барат

Орусиянын президенти Владимир Путин 18-19-августта Азербайжанга мамлекеттик сапар менен барат. Кремлден билдиргендей, сапардын жыйынтыгында мамлекет башчылары биргелешкен билдирүү кабыл алып, бир катар өкмөттөр аралык документтерге кол коюшат.

Сүйлөшүүлөр стратегиялык өнөктөштүктүн жана союздаштыктын алкагында Орусия-Азербайжан мамилелерин мындан ары өнүктүрүүгө, ошондой эле актуалдуу эл аралык жана аймактык маселелерди талкуулоого арналат.

Путиндин Бакуга сапары Москва менен Ереван ортосундагы мамилелердин начарлашынын, ошондой эле Армения бийлигинин ЖККУдан чыгуу ыктымалдыгы тууралуу билдирүүлөрүнүн фонунда болмокчу.

Эске салсак, Путин Азербайжанга акыркы жолу 2018-жылдын 27-сентябрында барган. Анда Бакуга болгон иш сапарынын алкагында, дзюдо боюнча Дүйнө чемпиондугуна катышып, IX Орусия-Азербайжан аймактар ​​аралык форумунун пленардык жыйынына катышып, Азербайжандын президенти Илхам Алиев менен жолугушуу өткөргөн.