Москва Киевди катаал чаралар менен коркутууда

Киев континенттин европалык бөлүгүндө радиоактивдүү булгануу менен катуу кырсык жаратууга аракет кылса, Орусия дароо “катуу жооп чараларды” көрүүгө даяр. Бул тууралуу Орусиянын Коргоо министрлиги билдирди.

Коргоо министрлиги ошондой эле Киевдин Курск атомдук электр станциясына чабуул жасоого даярдыгы тууралуу маалымат олуттуу түрдө кабыл алынганын белгиледи.

"Бул провокациянын максаты - Орусияны Украинадагы атомдук энергетикалык объектилерге сокку урууга негиз түзүү үчүн станцияда "өзүн-өзү аткылоо" үчүн айыптоо", - деп белгиледи Орусиянын Коргоо министрлиги.

Украинанын куралдуу күчтөрүнүн Курск аймагына чабуулу 6-августта башталып, он бир күндөн бери уланууда. Украин тараптын айтымында, операция башталгандан бери 1150 чарчы километр аянттагы 82 калктуу конуш көзөмөлгө алынды.

Буга чейин эки тарап тең тынчтык сүйлөшүүлөрүнө даяр экенин билдирип, бирок ар кандай шарттарды коюшкан. Украинанын Куралдуу күчтөрүнүн Курск облусуна чабуулу башталгандан кийин орус президенти Владимир Путин “жай тургундарга, жарандык инфраструктурага сокку урган же атомдук энергетика объектилерине коркунуч жаратууга аракет кылгандар” менен сүйлөш натыйжасыз экенин жарыялады.

The Washington Post гезити "Украинанын Курск облусундагы чабуулу Орусия менен Украинанын Дохада өтүшү керек болгон сүйлөшүүлөрүн үзгүлтүккө учуратты" деп жазды. Украина менен Орусия бул маалымат боюнча расмий комментарий беришкен жок.