Эрдоган Азербайжандын президентине ыраазычылык билдирди

Түркиянын президенти Режеп Тайып Эрдоган Азербайжандын президенти Илхам Алиев менен телефон аркылуу сүйлөштү. Бул тууралуу Түркиянын президентинин администрациясына таянып жергиликтүү басылмалар жазды.

Маалыматка караганда, сүйлөшүү учурунда өлкө лидерлери эки тараптуу мамилелердин актуалдуу маселелерин, ошондой эле аймактык жана глобалдык окуяларды талкуулашты.

Алиев Түркияны каптаган токой өртүнө байланыштуу тилектештигин билдирип, Азербайжан бардык зарыл колдоо көрсөтүүгө даяр экенин билдирди. Ошондой эле бул жардамдын алкагында Азербайжан Түркияга бир өрт өчүрүүчү учак жибергенин айтты.

Өз кезегинде түрк лидери азербайжан элине көрсөткөн колдоосу үчүн ыраазычылык билдирип, Түркия менен Азербайжандын ортосундагы бир туугандык мамилелер ушундай оор учурларда дагы бекемделе турганын белгиледи.