Орусияда Навальныйдын тарапташтары террористтердин тизмесине киргизилди

Мария Певчих

Росфинмониторинг Алексей Навальный негиздеген Коррупцияга каршы күрөш фондунун (ФБК) кызматкерлери Мария Певчих менен Кира Ярмышты “экстремисттер менен террористтердин” тизмесине киргизди. Бул тууралуу чет элдик басылмалар жазды.

Бул тизмеге кирүү алардын Орусиядагы бардык эсептери жана активдери бөгөттөлөт дегенди билдирет.

Мария Певчих учурда Коррупцияга каршы эл аралык фондду жетектейт, ал эми мурда Алексей Навальныйдын басма сөз катчысы болгон Кира Ярмыш азыр анын жесири Юлия Навальнаянын басма сөз катчысы болуп иштейт.

Певчих менен Ярмыштан тышкары Навальный жана анын фонду менен байланышы бар дагы жети адам “террорчулар менен экстремисттердин” реестрине киргизилген. Алардын арасында “Популяциялык саясат” каналынын алып баруучусу Дмитрий Низовцев, Навальный LIVE каналынын продюсери Нина Волохонская, Навальныйдын жашыруун штабы жана ФБКнын кайрымдуулук иштери боюнча соттолгон Алексей Маляревский, адвокаттар Александр Федулов менен Ольга Михайлова, ошондой эле журналисттер Ольга Комлева жана Антонина Фаворская бар.

Орус бийлиги мурда ФБК менен Навальныйдын штабын экстремисттик уюм деп тааныган. Бул түзүмдөр менен кандайдыр бир байланыш кылмыш жоопкерчилигине алып келиши мүмкүн. ФБКнын негиздөөчүсү Алексей Навальный 16-февралда абакта каза болгон.