Майк Тайсон блогер менен беттеш алдында көз караш таймашын өткөрдү

Легендарлуу америкалык мушкер Майк Тайсон блогер Жейк Пол менен беттешке чейинки көз караштар таймашын өткөрдү. Бул туурасында чет элдик спорт басылмалары жазууда.

Пол менен Тайсондун беттеши алгач 20-июлга белгиленип, кийин 15-ноябрга жылдырылган. Мындай чечим 57 жаштагы мушкердин ден соолугуна байланыштуу кабыл алынган.

Эки мушкердин беттеши профессионалдык статуска ээ экендиги айтылган.

Тайсон 2005-жылдан бери биринчи жолу расмий беттешке чыгат, ал акыркы жолу мекендеши Кевин Макбрайд менен мушташып, мөөнөтүнөн мурда утулуп калган.

Ал эми көргөзмө мушташка Майк Тайсон акыркы жолу 2020-жылдын 28-ноябрында кичи Рой Жонс менен чыккан. Беттеш эки мүнөттөн сегиз раундга созулуп, тең чыгуу менен аяктаган.

Атактуу мушкер америкалык блогер менен боло турган беттеши үчүн болжол менен 20 миллион доллар ала тургандыгы белгилүү болгон.