Саламаттык сактоо министрлиги маймыл чечек оорусу боюнча билдирүү таратты

Саламаттык сактоо министрлиги Кыргызстанда бүгүнкү күндө маймыл чечек оорусунун катталбагындыгын жана бул оору боюнча өлкөдө эпидемиологиялык абал стабилдүү экендигин билдирет. Бул туурасында бүгүн, 19-августта министрликтин маалымат кызматы кабарлады.

Маалымдалгандай, абал туруктуу сакталганы менен, алдын алуу чаралары көрүлүүдө.

Айта кетсек, 15-августта Бүткүл дүйнөлүк саламаттык сактоо уюму акыркы эки жылда маймыл чечек оорусунун чыгышы боюнча экинчи ирет дүйнөлүк мааниге ээ болгон өзгөчө кырдаалды жарыялады. Африканын айрым аймактарында адамдан адамга жугуучу маймыл чечек оорусу кескин өсүүдө. Жыл башынан бери Конго Демократиялык Республикасында ооругандардын саны өткөн жылдын көрсөткүчүнөн кыйла ашып, ооругандардын саны 15 600 адамды түзгөндүгү айтылууда.

Андан тышкары ушул жылдын 16-августунда Африкадан тышкары Швеция менен Пакистан өлкөлөрүндө дагы оорунун эки учуру катталгандыгы белгилүү болду.