Чолпон-Атада 4 жигит пляжда иштеп жаткан экскаватордун терезеси талкалоого шектелди

Чолпон-Ата шаарындагы пляжда экскаватордун терезесин сындырганга шектүүлөр кармалды. Бул тууралуу Ысык-Көл облустук ички иштер башкармалыгынан кабарлашты.

Милициянын маалыматына ылайык, Чолпон-Ата шаарынын 32 жаштагы тургуну арыз менен кайрылган. Арыз ээсинин билдиришинче, белгисиз адамдар 11-августтан 12-августка караган түнү шаардын пляжындагы иштерди жүргүзүп жаткан “SINOME ACY 410 H” үлгүсүндөгү трактордун терезесин сындырып кетишкен.

Аталган факты кылмыш-жаза кодексинин 280-беренеси (бейбаштык) менен кылмыш иши козголгон.

Милиция кызматкерлери тарабынан жүргүзүлгөн тергөө-ыкчам иш-чаралардын жүрүшүндө шектүүлөр аныкталып, кармалган. Шектүүлөр Чолпон-Ата шаарынын 19 жаштагы У.А., 18 жаштагы А.Б., Б.Н. жана Бостери айылынын 18 жаштагы тургуну Б.А. экени аныкталган.

Тергөө иштери жүрүп жатат, анын жыйынтыгы боюнча шектүүлөргө карата тиешелүү чаралар көрүлөт.