"Токмок жеген баланы урмайынча кетпейм деп..." Мунарбек Сейитбек уулу бокска кантип келип калганын айтты    

Париж Олимпиадасында күмүш байге алган кыргыз мушкери Мунарбек Сейитбек уулу Exclusive KG’ге берген маегинде бокска кантип келип, эмне үчүн спорттун бул түрүн тандап калганын айтты.

Ал бокс менен машыгууну 8 жашында баштаган.

"Бала кезде Жоомарт деген кошуна агабыз залга барып машыкчу. Аны көргөн жаш балдар ээрчип алат эле. Бир жолу мен да аны менен чогуу машыгууга бардым. Залдан мени бир бала менен мушташтырып койду, андан токмок жеп калгам. Ошондо аны урмайынча кетпейм деп намыстанып машыгып калдым.

Алгачкы машыктыруучум Турдаалы Оморов десем болот. Көп өтпөй Беганас Султанбаев агайым менен машыктым.

Алгач машыгууга классташтарым болуп барат элек. Жалпысынан 40тай бала барчубуз. Ошолордун ичинен аягында өзүм калдым. Анткени досторум барбай калган учурда мен кете берчүмүн. Муну менен жалкоолугумду да жеңе алдым. Бул боксту жакшы көргөнүмдөн да болсо керек", - дейт мушкер.

Ошондой эле ал бир дагы мушкерди жакшы көрүп, кумир тутпаарын кошумчалады.