Бишкекте Жукеев-Пудовкин көчөсүнүн бир бөлүгү унаа кыймылы үчүн ачылды

Бүгүн, 20-августта «Бишкек жылуулук тармагы» муниципалдык ишканасы Жукеев -Пудовкин көчөсүнүн Горький көчөсүнөн Кулатов көчөсүнө чейинки бөлүгүндөгү магистралдык жылуулук тармактарын реконструкциялоо иштери аяктагандыгын билдирет. Маалыматтты мэриянын басма сөз кызматы кабарлады.

Анда айтылгандай, бул тилке азыр унаа кыймылы үчүн ачык.

"Медеров көчөсүнөн Горький көчөсүнө чейин жайгашкан жылуулук тармагынын калган тилкелеринде иштер уланууда жана август айынын аягына чейин бүткөрүлөт",- деп айтылат маалыматта.

Эскерте кетсек, «Бишкек жылуулук тармагы» ишканасы Жукеев -Пудовкин көчөсүн бойлой магистралдык жылуулук тармагын масштабдуу реконструкциялап жаткандыгын айткан. Бул долбоордун алкагында диаметри 700 мм болгон түтүктөр толугу менен диаметри 900 мм болгон түтүктөргө алмаштырылып, бардык жапкычтар жаңыланды. Реконструкцияланган тармактын жалпы узундугу 845 метрди түзөт.