Колумбия Израилге көмүр сатуудан баш тартты

Колумбиянын президенти Густаво Петро

Колумбиянын президенти Густаво Петро Газада палестиналыктарга каршы колдонулган курал-жарактарды өндүрүүдө колумбиялык көмүр колдонулганын айтып, анын өлкөсү Израилге көмүр экспортун расмий түрдө токтоторун жарыялады.

​​Ал мындай чечимди Израилдин Газага уланып жаткан чабуулдарына байланыштырды.

"Колумбиянын көмүрү палестиналык балдарды өлтүргөн бомбаларды жасоо үчүн колдонулууда", - деп жазды Петро.

Президент Петро кол койгон жарлык жарыялангандан беш күн өткөндөн кийин күчүнө кирет.

Жалпы көмүр экспортунун 5 пайызын Израилге жөнөткөн Колумбия өткөн жылдын ноябрында Түштүк Америкада биринчилерден болуп Израилдеги элчисин чакыртып алган.

Быйыл майдын башында президент Петро Израилдин Газадагы аракеттери үчүн дипломатиялык мамилесин толук үзөрүн жарыялаган. Элчилик 3-майда жабылган.

Газанын Саламаттыкты сактоо министрлиги Израилдин эксклавды басып алуусу башталгандан бери 40 миң 99 палестиналык каза болгонун билдирди.