Жер шарындагы эң кары адам каза болду

Дүйнөдөгү эң кары адам деп эсептелген испаниялык Мария Браньяс Морера 117 жашында көз жумду. Бул тууралуу чет элдик басылмалар жазышты.

Маалыматка ылайык, ал дүйшөмбү күнү, 19-августта ооруп, уктап жаткан жеринен кыйналбай каза болгонун жакындары билдиришкен. Маркум 117 жыл 169 күн жашаган.Анын өлүмүнөн кийин жер шарындагы эң кары адам япониялык Томико Итоока болуп калды. Анын төрөлгөнүнө 116 жыл 90 күн болду.

Мария Браньяс Морера 1907-жылы 4-мартта Американын Калифорния штатындагы Сан-Франциско шаарында туулган. Ал сегиз жашында үй-бүлөсү Испанияга көчүп, Каталонияга отурукташып, Морера бүткүл өмүрүн ошол жерде өткөргөн.

Мария Браняс дарыгерге турмушка чыгып, үч бала төрөгөн. Ал 1976-жылы жесир калып, андан кийин турмушка чыккан эмес. Бул анын жашоосундагы жалгыз оор жоготуу эмес, ал буга чейин жалгыз уулунан дагы ажыраган.

Морера өмүрүнүн акыркы 20 жылын карылар үйүндө өткөргөн. Жашы улгайып калганына карабастан, анын физикалык жана психикалык ден соолугуна эч кандай даттануулары болгон эмес. Өлөрүнүн алдында Морера өзүн алсыз сезип жатканын гана айткан.