Парижге Кыргызстандын Паралимпиада курама командасы узатылды

Бүгүн, 21-августта министрлер кабинетинин төрагасынын орун басары Эдил Байсалов өлкөнүн Паралимпиада курама командасын Парижде боло турган XVII Жайкы оюндарына узатты. Бул туурасында өкмөттүн маалымат кызматы кабарлады.

Байсалов оюнчуларды лицензия алышы менен куттуктап, алардын жетишкен ийгиликтери үчүн сыймыктанарын билдирди.

Бул жолку Паралимпиада оюндарында өлкө намысын пауэрлифтинг, триатлон, жеңил атлетика жана дзюдо сыяктуу спорттун түрлөрү боюнча 4 спортчу коргойт.

Министрлер кабинетинин төрагасынын орун басары мамлекеттик тууну Кыргызстандын Паралимпиада курама командасынын капитаны Маматибраим Сурановго тапшырды.

Белгилей кетсек, оюндар 28-августтан 8-сентябрга чейин Франциянын борбору Париж шаарында өтөт. Жалпы 22 спорттун түрүнөн 549 медаль топтому ойнотулат. Мелдештер Олимп оюндары уюштурулган спорттук жайларда өткөрүлөт.