Кыргызстандык жаш балбан Дүйнө чемпиондугунда күмүш байге алды

Кыргыз балбаны Кутман Калбаев Иорданиянын Амман шаарында өтүп жаткан 17 жашка чейинкилер арасындагы Дүйнө чемпиондугунда күмүш байге тагынды.

Жаш балбан 51 килограммга чейинки салмакта күч сынашты.

Ал 1/8 финалдык беттеште Армениянын балбанын 13:3 эсебинде жеңсе, 1/4 финалдык беттеште грузиялык спортчуну 7:2 эсебинде утту. Жарым финалда ирандык балбанды утуп, финалда азербайжандык Туран Дашдамировго жеңилип калды.

Грек-рим күрөшү боюнча бизде жалпы 4 кадеттер арасында Дүйнө чемпиондору бар. Алгач 1996-жылы Уран Калилов кадеттер арасында Дүйнө чемпиону болгон. Андан дээрлик 20 жыл өткөндөн кийин бул жетишкендикке Акжол Махмудов жеткен.

Ал эми акыркы жолу 2021-жылы эки кыргыз балбаны, тагыраагы, Нуристан Сүйөркулов менен Раззак Бейшекеев бул титулга ээ болушкан.