Кыргызстандык эки балбан өспүрүмдөр арасындагы Дүйнө чемпионатынын финалына чыкты  

Иорданиянын Амман шаарында өтүп жаткан 17 жашка чейинки өспүрүмдөр арасындагы Дүйнө чемпионатында кыргызстандык балбандар Курсантбек Исаков менен Рустамжан Кахаров финалга чыгышты. Бул тууралуу Дене тарбия жана спорт департаментинен билдиришти.

Маалыматка ылайык, 55 килограммга чейинки салмакта күч сынашып жаткан Курсантбек Исаков алгач япониялык, андан кийин казакстандык балбанды утту. Андан соң америкалык спортчуну 10:2 эсебинде жеңип финалга чыкты. Эми алтын медаль үчүн Пуэрто-Риконун балбаны менен күч сынашат.

Ал эми Рустамжан Кахаров 65 килограммга чейинки салмак категориясында катышууда. Жаш балбан ирандык, андан кийин австралиялык, грузиялык жана казакстандык балбандарды жеңип, финалга жолдомо алды. Ал финалда Орусиянын жаш балбаны менен күч сынашат.