Өзбекстанда сакал койгон эркектерге айып пул салынды

Өзбекстанда сакал койгон бир катар эркектерге айып пул салынды. Бул тууралуу өлкөнүн Жогорку сотунун маалыматына таянып жергиликтүү басылмалар жазып чыгышты.

Газета.uz сайты жазгандай, Ташкент облусунда сакал койгон эркектерге каршы рейддин алкагында бир катар эркектер полиция бөлүмүнө жеткирилген. Алар сакалын алууга аргасыз болушкан, айрымдары айып пул төлөшкөнү айтылды.

Буга былтыр октябрь айында кабыл алынган мыйзам себеп болгон. Ага ылайык, мыйзамда коомдук жайларда адамдын өздүгүн аныктоого мүмкүн болбогудай сакал өстүрүп алгандарга 3,4 миллион сумдан 5,1 миллион сумга чейин айып салуу каралган.

Өлкөнүн Ички иштер министрлиги эркектердин укугу бузулган учурда арыз менен кайрыла ала турганын белгилеген.

Буга чейин да Ташкентте ондогон эркектин сакалы мажбурлап алынганы маалымдалган.