Талас шаарында "Укук тартип" иш-чарасы болуп өттү

Талас шаардык ички иштер бөлүмү тарабынан “Укук тартип” аталышындагы профилактикалык иш-чара өткөрүлдү. Бул тууралуу бүгүн, 28-августта облустук милициядан билдирди.

Ага ылайык, аталган иш-чаранын алкагында 4 уурулук, 1 алдамчылык фактысы аныкталып, 47 укук бузуу протоколу түзүлдү.

"Мас абалында унаа башкарган 2 айдоочу аныкталып, соттук кароого жөнөтүлдү.

Ошондой эле 1 сайсыз ок атуучу курал өткөрүлүп алынды. Ок атуучу куралдарды сактоо шарттары боюнча 21 акты түзүлүп, текшерилди. Дайынсыз жоголгон 1 өспүрүм кыздын жүргөн жери аныкталып, Чүй облусундагы кризистик борборго жиберилди.

Мындан тышкары Талас шаарынын борбордук базарында тилемчилик кылган 7 жаран аныкталып, түшүндүрүү иштери жүргүзүлдү", - деп жазылат анда.

Ошондой эле чет өлкөлөрдөн Талас шаарына иштөөгө келген 10 жарандын документтеринин мыйзамдуулугу текшерилген. Жалпысынан 92 үй текшерилип, 167 жарандын өздүгү такталган.