Талас шаарындагы мектеп жана бала бакчаларда оңдоп-түзөө иштери жүрүүдө

Үлүштүк гранттардын эсебинен Талас шаарындагы мектепке чейинки жана жалпы орто билим берүү мекемелеринде оӊдоп-түзөө иштери аяктоо алдында турат. Бул тууралуу шаардык мэриядан кабарлады.

Маалыматка ылайык, кечээ, 27-августта билим берүү мекемелериндеги оңдоо иштерин шаар мэри Байышбек Астанакулов текшерди. Анда мэр аткарылып жаткан иштердин сапатына жана мөөнөтүндө аяктоого өзгөчө көңүл буруу керектигин айтты.

"Гранттардын эсебинен шаардагы №1 мектептин аймагындагы кичи футбол аянтчасын оӊдоого 1 миллион 300 миң 163 сом, ошол эле мектептин сырткы фасадын жаӊыртууга 3 миллион 550 миң 295 сом, ал эми №2 мектептин алдына таман таш төшөөгө жана спорт залдын жылуулук системасын жаңыртууга 3 миллион 409 миң 985 сом бөлүндү.

Ошондой эле №9 мектептин капиталдык оңдоп-түзөө иштерине 2 миллион 910 миң 99 сом бөлүнүп берилди", - деп жазылат анда.

Мындан тышкары №9 “Буратино” бала бакчасы, №15 “Ак бешик” бала бакчасы, №3 мектеп гимназиясы, №6 “Теремок” бала бакчасы жана №7 мектептин оңдоп-түзөө иштерине тиешелүү каражат бөлүнгөн. Аталган иштерди жаңы окуу жылына карата аяктоо пландалууда.