Иран-Кыргызстан беттешин каяктан көрөсүз? Футбол биримдиги Бишкекте ири фан-зона уюштурат

Дүйнө чемпиондугуна тандап алуу оюндарынын алкагындагы Иран-Кыргызстан беттеши Бишкектеги "Ала-Тоо" аянтында түз эфирде көрсөтүлөт. Бул тууралуу Кыргыз футбол биримдиги кабарлады.

Фан-зона 5-сентябрь күнү саат 20:00дө уюштурулат.

"Ак шумкарларды" колдоо үчүн келгендерди кызыктуу шоу-программа, оюн аянтчалары, баалуу белектер менен ойнотулган конкурстар күтөт. Шоу-программанын алкагында эстрада ырчылары Баястан, Nilo жана Айыма Айылчиева ырдашат. Иш-чаранын алып баруучусу Алинур Абдыкалыков жана Нурсултан Курсанали уулу болмокчу.

"Иш-чарага кирүү акысыз. Үй-бүлөңүз менен келиңиз, Кыргызстандын курама командасын колдоңуз жана кечени футбол сүйүүчүлөрү менен кошо өткөрүңүз!" - деп билдиришти Кыргыз футбол биримдигинен.

Оюндун өзү Бишкек убактысы боюнча саат 22:00дө старт алат.