Чоң Чүй каналында изделип жаткан 15 жаштагы баланын сөөгү табылды

Бүгүн, 30-августта Чоң Чүй каналынан 15 жаштагы өспүрүмдүн сөөгү табылды.

Өзгөчө кырдаалдар министрлигинен билдиргендей, баланы издөөгө бүгүн жалпы 10 куткаруучу 2 кайык менен чыгышкан.

Жарандар аталган каналда белгисиз адамдын сөөгү агып баратканын көрүп, куткаруучуларга маалымат берген. Куткаруучулар өспүрүмдүн сөөгүн чыгарып, милиция кызматкерлерине өткөрүп беришти.

Эске салсак, 23-августта Көк-Жар айылынан 15 жаштагы бала сууга агып кеткендиги тууралуу маалымат түшкөн. Аталган жаранды издөө министр Бообек Ажикеевдин жеке көзөмөлүндө жүргүзүлгөн.