Чүйдө МАИ кызматкери жумуш учурунда сабалган. Милиция 33 жаштагы жаранды кармады

Чүй облусунун аймагынан Жол кыймылынын коопсуздугун камсыздоо башкармалыгынын кызматкерине кол көтөргөн деген шек менен 33 жаштагы жаран кармалды. Бул тууралуу облустук милиция билдирди.

Маалыматка ылайык, кечээ, 1-сентябрь күнү Москва РИИБи боюнча ЖКККБнын кызматкерлери тарабынан жүргүзүлүп жаткан рейд учурунда Volkswagen Passat үлгүсүндөгү унаасы токтотулуп, текшерүүгө алынган. Текшерүү учурунда автокөлүктүн айдоочусу жол тескөөчүнүн талабына баш ийбестен каршылык көрсөтүп, кол көтөргөн. Анын кесепетинен МАИ кызматкери райондук ооруканага жеткирилген.

Бул факты боюнча Кылмыш-жаза кодексинин 280-беренесинин (Бейбаштык) негизинде кылмыш иши козголгон.

Шектүү катары 1991-жылы туулган А.Б. аттуу жаран кармалып, убактылуу кармоочу жайга киргизилген.

Учурда окуя боюнча соттук-медициналык экспертизалар дайындалып, тергөө амалдары жүргүзүлүүдө.