Баткенде 28 жаштагы жигит вино сактоочу жайда ууланып каза болду

Баткенде жайгашкан вино сактоочу жайда 2 жаран ууланып, бири каза болду. Бул тууралуу маалыматты бүгүн, 2-сентябрда облустук милициянын басма сөз кызматынан тастыктады.

Милиция билдиргендей, 31-август күнү Баткен районунун Чоң-Талаа айылында жайгашкан вино сактоочу жайдагы 10 тонналык идиштерди тазалап жаткан 51 жана 28 жаштагы эки жаран ууланышкан. Тилекке каршы, 28 жаштагы жаран ооруканага жетпей каза болгон.

"Маркумдун жакындары соттук-медициналык кароодон баш тартып, жансыз денени ооруканадан алып кетишкен. Учурда текшерүү иштери жүрүп жатат", - деп айтылат маалыматта.

Вино сактоочу жай "Глобал Алко" ЖЧКсына таандык экени айтылууда.