Түркиянын Коргоо министрлиги Ирак менен Сирияда 17 террорчу "жок кылынганын" жарыялады

Түркиянын куралдуу күчтөрү кечээ, 1-сентябрда Ирак жана Сириянын түндүгүндө жүргүзгөн операцияларында 17 террорчуну "нейтралдаштырганын" Коргоо министрлиги билдирди.

Маалыматка караганда, Ирактын түндүгүндө Күрдистан жумушчу партиясынын (PKK) 15 мүчөсү "жок кылынды". Ошондой эле Сириянын түндүгүндөгү Манбиж шаарында өткөрүлгөн өзүнчө операцияда күрттөрдүн Элдик коргонуу күчтөрүнө (YPG) таандык 2 аскер кызматкери "нейтралдаштырылды".

Министрлик Түркиянын террорчуларга каршы активдүү иш-аракеттерин уланта турганын белгиледи.

Кошумчалай кетсек, Түрк өкмөтүнүн отчётторунда көп колдонулган "нейтралдаштырылган" термини сөз болгон "террористтердин" багынып бергенин, өлгөнүн же колго түшкөнүн билдирет.

PKK Түркия, АКШ жана Европа Биримдиги тарабынан террордук уюмдардын тизмесине кирген. Түрк бийлиги аталган уюм 30 жылдан ашуун убакыттан бери түрк өкмөтүнө каршы козголоң чыгаруу иштерин жүргүзүп келерин белгилейт.

Түркия Ирак жана Сириядагы PKK жана YPG согушкерлерине каршы операцияларын активдүү жүргүзүп келет.