Өзгөндө бала бакчадан чыккан 2 жашар наристе каналга түшүп кетип каза болду

Ош облусунун Өзгөн районуна караштуу Кароол айыл аймагында 2 жашар наристе каналга түшүп кеткени тууралуу маалыматты бүгүн, 3-сентябрда облустук милициянын басма сөз кызматынан тастыктады.

Маалыматка ылайык, 8-августта милицияга аталган айыл аймактагы бала бакчалардын биринен 2 жаштагы бала чыгып кеткен бойдон дайынсыз болуп жаткандыгы тууралуу маалымат түшкөн.

Бул факты каттоого алынып, тергөөгө чейинки текшерүү иштери башталган.

"Дайынсыз болуп жаткан наристе бала бакчанын жанындагы аккан каналга түшүп кетип, каза болуп калгандыгы маалым болду. Окуя боюнча күбөлөр суралып, өлүмдүн себебин аныктоо боюнча тийиштүү экспертизалар дайындалган. Баланын ата-энеси эч кимге доосу жоктугун билдиришип, арыз жазуудан баш тартышкан", - деп айтылат маалыматта.

Учурда тергөө амалдары уланууда.