Нарында күйөөсү бычактап жаткан аялды куткарып калган кызматкер "Каармандык" медалы менен сыйланды

Нарын райондук ички иштер бөлүмүнүн тергөөчүсү, милициянын ага лейтенанты Жеңишбек Муканбетов "Каармандык" медалы менен сыйланды. Бул тууралуу бүгүн, 4-сентябрда Нарын ОИИБинен билдирди.

Маалыматка ылайык, ИИМдин медалы ага адам өмүрүнө коркунуч туудурган өзгөчө кырдаалда кайраттуулук көрсөткөндүгү үчүн ыйгарылган.

Буга чейин Муканбетов облус башчысы Алтынбек Эргешов тарабынан сыйланган.

Эске салсак, 2-сентябрда Нарындагы "Он-Арча" базарынын ичиндеги ашканада 42 жаштагы жаран ашпозчу болуп эмгектенген 41 жаштагы келинчегин 31-август күнү бычактаганы белгилүү болгон. Шектүү кармалып, 2 айга камакка алынган.