Париж Олимпиадасынан кийин жигити кол салган спортчу каза болду

Париж Олимпиадасына марафондо чуркоо боюнча катышкан угандалык Ребекка Чептегеи жигитинин кол салуусунан кийин каза болду. Бул тууралуу Уганданын жеңил атлетика федерациясынын басма сөз кызматы билдирди.

Буга чейин Чептегеи денесинин 75 пайызы күйүп ооруканага түшкөн. Маалым болгондой, спортчу менен жигити Даниэль Ндиема уруша кетип, жигити кызга бензин чачып, өрттөп жиберген. Жигити дагы күйүк алып, ошол эле ооруканада дарыланууда.

"Бүгүн таң эрте зомбулуктун курмандыгы болгон спортчубуз Ребекка Чептегеи каза болгонун кайгыруу менен жарыялайбыз. Биз мындай аракеттерди айыптайбыз жана адилеттүүлүккө чакырабыз", - деп айтылат федерациянын билдирүүсүндө.

Угандалык спортчу Парижде өткөн Жайкы Олимпиада оюндарында марафондо чуркоо боюнча 44-орунду ээлеген.