Чүйдө таңга жуук тамактануучу жайды тоноого шектүү кармалды

Чүй облусунун Жайыл районундагы тез тамактануучу жайга каракчылык кылган 47 жаштагы шектүү жаран кармалды. Бул тууралуу бүгүн, 6-сентябрда облустук милиция билдирди.

Маалыматка ылайык, 30-август күнү милиция 52 жаштагы жаран арыз менен кайрылган. Арыз ээсинин айтымында, ошол эле күнү саат 04:48 чамасында тамактануучу жайга жүзүн жашырган адам кирип барып, колундагы союл менен аны коркутуп, кассадагы 42 миң сомун жана Redmi, Samsung A30 аталышындагы телефондорду тартып алып, эшикти сыртынан бекитип качып кеткен.

Бул факты боюнча Кылмыш-жаза кодексинин 207-беренесинин (Каракчылык) негизинде кылмыш иши козголгон.

Шектүү катары 1977-жылы туулган жаран кармалып, убактылуу кармоочу жайга киргизилген.

Учурда тергөө иштери уланууда.