Бишкекте 22 жаштагы жигит 145 грамм гашиш менен колго түштү

Ички иштер министрлиги Бишкек шаарында жүргүзүлгөн атайын операция учурунда баңгизат менен алектенген 22 жаштагы шектүү жаран кармалганын билдирди.

Маалыматка ылайык, ал 17 грамм баңгизат менен кармалган жана тергөө учурунда өз ыктыяры менен жашаган жерине сактап келген баңгизаттарды дагы тапшырып берген.

Бул факт боюнча Кылмыш-жаза кодексинин 282-беренесинин 1-бөлүмү (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо, сатып алуу, сактоо, ташуу, жөнөтүү, ошого тете мыйзамсыз өндүрүү же сатып өткөрүү) менен кылмыш иши козголгон. Алынган зат гашиш экенин, анын жалпы салмагы 145 грамм болгонун соттук-химиялык экспертиза аныктаган.

Министрлик кармалган жаран №1 тергөө абагына киргизилгенин, учурда тергөө иштери улантылып жатканын кошумчалады.