Бир жыл мурун качып кеткен "Женгонун" уюшкан кылмыштуу тобунун мүчөсү чек арадан кармалды 

"Женго" каймана аты менен белгилүү криминалдык авторитет Кадыр Досоновдун уюшкан кылмыштуу тобунун активдүү мүчөсү өлкөдөн чыгууга аракет кылып жаткан учурда кармалды. Бул тууралуу бүгүн, 9-сентябрда УКМКдан билдирди.

Маалыматка ылайык, 2-сентябрда чек арадан өтүүгө аракет кылып жаткан учурда "Ак-Жол" көзөмөл-өткөрүү жайында Досоновдун уюшкан кылмыштуу тобунун активдүү мүчөсү, мурда киши өлтүрүү менен соттолгон, 1992-жылы туулган Жалал-Абад облусунун тургуну А.У. кармалды.

"2023-жылы октябрь айында А.У.нун жашаган жеринен жашыруун алып жүрүү үчүн конструкциясы өзгөртүлгөн ок атуучу курал, ок-дарылар табылып алынган. Ошол кезде А.У. укук коргоо органдарынан качып кетүүгө үлгүргөн", - деп айтылат маалыматта.

Шектүү УКМКнын убактылуу кармоочу жайына киргизилип, тергөө иштери жүрүп жатат.