"Базарда бар, мектепте жок". Депутат Айдарова баласына 700 сомдон китеп алып бергенин айтты

Бүгүн, 12-сентябрдагы Жогорку Кеңештин жыйынында депутат Айгүл Айдарова өкмөттөн мектептеги китеп тартыштыгын чечүүнү суранды.

Ал 2 жыл мурун Акылбек Жапаровдун китеп маселеси чечилерин айткан сөзүн эске салды.

"2022-жылы 8-декабрда Акылбек Үсөнбекович "Учкун" басмаканасына китеп басып чыгаруучу жабдууларды алуу үчүн Германияга буюртма бердик, буюрса, жаңы жылдан кийин чечилет" деп айткан. Бирок китеп маселеси ушул күнгө чейин орчундуу маселе болуп турат. Бир китеп 500 сомдон 800 сомго чейин. Эмне үчүн базарда бар китеп мектепте жок? Анын себебин ата-энелерге түшүндүрүшүбүз керек. Көптөгөн орчундуу реформалар болуп жатат, бирок чече албай жатабыз. Ушунчалык кыйынбы бир китеп маселесин чечип коюш?

Жеке өзүм бир балама 9 китепти 700 сомдон алдым, 5-6 баласы бар ата-энелерге кыйын болуп жатат. Биз айтып эле жатабыз, өкмөт эч кандай жооп кылбай жатат да. Сураныч, өкмөт олуттуу карап, жооп кылып койсоңуздар", - деди Айдарова.