Ысык-Көлдөн жыл башынан бери 13 миң килограммдан ашык таштанды чыгарылды 

Ысык-Көлдү таштандылардан тазалоо иштери жигердүү улантылып, жыл башынан бери 13 миң килограммдан ашык таштанды чыгарылган. Бул тууралуу Өзгөчө кырдаалдар министрлиги кабарлады.

Маалыматка ылайык, былтыр 12-марттан баштап көлдүн төрт тарабы толук тазаланган. Быйылкы жылы да тазалоо жумуштары колго алынып, жыл башынан бери 13 миң 550 килограмм таштанды, 32 миң 700 метр балык уулоочу тор чыгарылган.

"Суучулдардын баамында таштандылардын көлөмү быйылкы жылы өткөн мезгилге салыштырмалуу арбын экени байкалууда. Мындай көрүнүш тазалыкка үндөгөн эскертүү жана эрежелердин сакталбай жатышы жана эс алуучулардын көптүгү менен байланыштуу", - деп билдирди министрлик.

Ошондой эле учурда ӨКМдин суучулдары көл жээктерин ар кандай таштандылардан арылтууну улантып, муниципалдык жана жеке менчик эс алуу жайларындагы көлдүн түбүндөгү тор, калдыктарды жок кылып жатканы айтылды.