Кыргыз улакчысы Манас Ниязов казак күйөрмандарынын арасында талашка түштү (видео) 

Бүгүн, 12-сентябрда Астана шаарында өтүп жаткан Дүйнөлүк көчмөндөр оюндарында жер улактын финалдык беттешинен кийин кыргыз улакчысы Манас Ниязов казак күйөрмандарынын талашына түштү.

Көк бөрү федерациясы бөлүшкөн видеодон кыргыз улакчысы менен кезек күтүп сүрөткө түшүп жаткан күйөрмандардын арты арбын экендигин көрүүгө болот.

Анда ат майданга келгендер улакчыны алкап, жеңиш кыргыздардыкы деген сөздөрүн да айта кетишкен.

Белгилей кетсек, Астана шаарында өтүп жаткан V Дүйнөлүк көчмөндөр оюндарында жер улактын финалдык беттешинде Казакстан курамасынын оюнчусу Улан Байтөреев атаандашы Кубанычбек Султан уулун камчы менен чаап жиберген. Мындан улам чыр чыгып, биринчи тайм бүтөрүнө 6 мүнөт калганда оюн токтотулуп, 15 мүнөттөй үзгүлтүккө учурады. Алгачкы бөлүк 3:1 айырмачылыгы менен кыргыз курмасынын пайдасына аяктады.

Оюндун экинчи бөлүгүндө эсеп саны 4:4кө теңелди. Мындан улам жер улактын эрежеси боюнча кошумча 10 мүнөт убакыт берилди.

Кошумча убакытта казак улакчысы калыстын ышкырыгы жаңырганга чейин эле эңкейип улакты алып кетти, калыс да оюнду токтоткон жок. Мындай калпыстыктар оюндун жүрүшүндө көп эле болуп жатты. Анда Казакстандын командасы биринчи болуп улак салып, 4:5 эсебинде жеңүүчү аталды.