Бишкекте жарандын iPhone 13 телефонун тартып алганга шектелип 20 жана 21 жаштагы жигиттер кармалды

Бишкек шаарында тоноого шектелип 20 жана 21 жаштагы жарандар кармалды. Бул тууралуу бүгүн, 13-сентябрда Октябрь РИИБинен билдирди.

Маалыматка ылайык, 11-август күнү милицияга М.А. аттуу жаран арыз менен кайрылган. Ал 10-август күнү белгисиз адамдар скутер менен 60 миң сомдук iPhone 13 үлгүсүндөгү телефонун тартып алышканын айткан.

Бул факты боюнча Кылмыш-жаза кодексинин 206-беренесинин (Тоноо) негизинде кылмыш иши козголгон.

Шектүү катары 2004-жылы туулган Д.У. жана 2003-жылы туулган Ш.А. аттуу жарандар кармалып, убактылуу кармоочу жайга киргизилген.

Учурда алардын ушул сыяктуу кылмыш фактыларын жасоого катыштыгы бар экендиги аныкталууда.