Зеленский Орусиянын ракетасы Кара деңизде дан кемесине тийгенин айтты

Украинанын президенти Владимир Зеленский Орусиянын ракетасы Египетке бараткан буудайы бар кемеге тийгенин айтты.

"Орусиянын ракетасы Египетке бараткан буудайы бар кемеге тийди. Бүгүн түнү Орусия Кара деңиздеги катардагы жарандык кемеге Украинанын суулардагы аймагынан чыгып кеткенден кийин дароо кол салды", - деп жазган Зеленский социалдык тармактагы баракчасына.

Украин президенти кол салуудан эч ким жабыркабаганын кошумчалап, Украинанын "дүйнөлүк азык-түлүк коопсуздугунун негизги кепили" катары ролун эске салды. Ал дүйнө жүзү боюнча ондогон өлкөлөрдүн стабилдүүлүгү украин дан коридорунун нормалдуу жана тоскоолдуксуз иштөөсүнөн көз каранды экенин белгилеп, Африка жана Жакынкы Чыгыш өлкөлөрүн азык-түлүк менен камсыздоо маселеси курч экенин айтты.

"Биз портторубузду, Кара деңизди жана дүйнөлүк рынокко азык-түлүк экспортун коргоо үчүн бардык күч-аракетибизди жумшайбыз. Украинанын чыныгы приоритети - өмүрдү коргоо. Бул бардык өлкөлөр үчүн приоритет болушу зарыл. Биз дүйнөнүн реакциясын күтүп жатабыз. Буудай жана азык-түлүк коопсуздугу эч качан ракеталардын бутасы болбошу керек", - деди Зеленский.

Орус бийлиги бул билдирүүгө азырынча комментарий бере элек.