УКМК Азимбек Бекназаровдун кармалышы боюнча билдирүү жасады

Бүгүн, 13-сентябрда Улуттук коопсуздук мамлекеттик комитети Азимбек Бекназаров кармалганын тастыктады.

Маалымдалгандай, ал кечээ Кылмыш-жаза кодексинин 222-беренесинин 3-бөлүгүнүн 3-пунктунда (Кылмыштуу жол менен алынган ири өлчөмдөгү кирешелерди адалдоо) көрсөтүлгөн кылмышты жасаган деген шек менен кармалып, УКМКнын убактылуу кармоочу жайына киргизилген.

Атайын кызмат анын кармалышы 2010-жылдын апрель айында болгон окуялардын жүрүшүндө банк ячейкаларынан жана өкмөт үйүнөн алынган акча каражаттарын уурдоо жана коротуу фактысы боюнча козголгон кылмыш ишине байланыштуу экенин белгиледи.

"Тергөөнүн жүрүшүндө Бекназаровдун укук коргоо органдары тарабынан көрсөтүлгөн жагдайлар боюнча камакка алынган ири суммадагы акча каражаттарын ыйгарууга катыштыгы бар экендиги аныкталган. Ошондой эле алынган маалыматтар Бекназаров Ысык-Көлдүн курорттук зонасынын аймагында, Бишкек шаарында, Чүй жана Жалал-Абад облустарында кымбат баалуу кыймылсыз мүлк объекттерин сатып алуу жана аларды жалган адамдарга тариздөө аркылуу кылмыш жолу менен алынган акча каражаттарын мыйзамдаштыргандыгын айгинелейт", - деп айтылат маалыматта.

УКМК бул иш боюнча Бекназаровго тиешелүү айып мыйзамда белгиленген мөөнөттө тагыларын, анын баш коргоо чарасы сот тарабынан чечилерин кошумчалады.

Эске салсак, кечээ Бекназаровдун уулу Руслан Бекназаров атасын УКМК камакка алганын билдирген.