Бишкекте соода борбордогу балдар ойноочу аянтчадан тирүүлөй жылан табылды

Бишкектеги соода түйүндөрүнүн бириндеги оюн-зоок аянтында кумдун үстүнөн жылан табылды. Бул маалыматты SUPER.KG порталына Ленин райондук милициясы тастыктады.

Маалымдалгандай, “Ала-Арча” соода түйүнүндөгү кичинекей зоопарктан качып чыккан жылан, оюн-зоок аянтына кирип кеткен. Окуя бүгүн, 13-сентябрда катталып, аны наристесин кумга отургузганы барган киши көрүп калган.

Ленин райондук ички иштер башкармалыгынын кызматкерлери жеринде соода түйүндүн жана зоопарктын ээлерине түшүндүрүү иштерин жүргүзгөн. Соода борборунун администрациясы эртең, 14-сентябрдан баштап зоопарктын ишин токтотуу каралып жаткандыгын маалымдаган.

Белгилей кетсек, 12-августта соода түйүндө жайгашкан зоопарктагы жылан 15 жаштагы кыздын колун тиштеп алган окуя катталган.