Ысык-Көлдө фитосанитардык сертификаттарды берүүдө коррупциялык схема аныкталды

Суу ресурстары, айыл чарба жана кайра иштетүү өнөр жайы министрлигине караштуу Химиялаштыруу жана өсүмдүктөрдү коргоо департаментинин жооптуу кызматкери пара алган деп шектелүүдө. Бул туурасында кечээ, 13-сентябрда ИИМдин маалымат кызматы билдирди.

Маалымдалгандай, Балыкчы шаарында фитосанитардык көзөмөлдүн кызматкерлери ишкерлерден фитосанитардык сертификат үчүн мыйзамсыз акча төлөп берүүнү талап кылышкан. Алар 13 миң, 8 миң жана 10 миң сом суммасында акча каражаттарын алышкан.

Ыкчам иш-чаралардын жүрүшүндө ортомчу болгон М.И., П.П. аттуу жарандар акча алып жаткан жеринден кармалган. Алардын жашаган жерине тинтүү жүргүзүлүп, компьютерлер, фитосанитардык сертификаттар жана башкалар алынган. Бул факт боюнча Кылмыш-жаза кодексинин 344-беренесинин 1-бөлүгү (Пара алууда ортомчулук кылуу) боюнча кылмыш иши козголду.

Бир нече убакыттан кийин Ысык-Көл химиялаштыруу жана өсүмдүктөрдү коргоо карантини боюнча департаментинин инспектору К.Р. кармалды. Ал камакка алынган.

Кармоо иш-чаралары бир нече ай мурун жасалган. Кылмыш иши тергелип бүтүп, материалдар сотко жөнөтүлдү.