Токмокто тыюу салынган эндик өсүмдүгүн ташып бара жаткан чет элдик жаран кармалды

Токмок шаарында милиция кызматкерлери тарабынан эндик өсүмдүгү менен бара жаткан чет элдик жаран кармалды. Бул тууралуу Чүй ОИИБинин маалымат кызмат билдирди.

Маалымдалгандай, кечээ, 13-сентябрда Токмок шаарындагы автобекетте чет элдик жарандын башкаруусундагы «Хонда-Степ-вагон» унаасы токтотулган. Анда үч кап эндик уругу табылган.

Бул факт боюнча Кылмыш-жаза кодексинин 308-беренеси (Сейрек кездешүүчү жаныбарларды жана өсүмдүктөрдү жок кылуу) менен кылмыш иши козголду. Унаадан чыккан 3 кап өсүмдүктүн салмагы 82 килограмм 600 граммды түзгөн. Мындан тышкары дагы бир даректен ага тийиштүү 120 килограммдан ашык өсүмдүктү табышкан.

Учурда 1955-жылы туулган Ш.Д. аттуу чет элдик жаран кармалып, иликтөө иштери уланууда.

Белгилей кетсек, эндик өсүмдүгүн Кыргызстандын аймагында чогултууга жана сатууга тыюу салынган.