ДСУ маймыл чечекке каршы биринчи вакцинаны бекитти

Дүйнөлүк саламаттыкты сактоо уюму (ДСУ) "MVA-BN" маймыл чечекке каршы вакцина болорун жарыялады. Бул туурасында чет элдик басылмалар жазышты.

Маалымдалгандай, вакцина өтө муктаж болуп, илдет жайылып кеткен аймактарга жеткиликтүү болот. Ошондой эле тез таралышын азайтат жана эпидемияны токтотууга жардам берет деп күтүлүүдө.

ДСУнун алдын ала квалификациялык баалоосу өндүрүүчү Bavarian Nordic A/S берген маалыматына жана вакцина үчүн жооптуу жөнгө салуучу орган болгон Европалык Дары-дармек агенттигинин көрсөтмөсүнө негизделген.

"MVA-BN" вакцинасын 18 жаштан жогорку жарандарга 4 жума аралыгында 2 доза сайса болот. Аны муздаткычта 2-8 градус температурада 8 жумага чейин сактоо каралгандыгы айтылат.

Айта кетсек, август айынын ортосунда Дүйнөлүк саламаттыкты сактоо уюмунун (ДСУ) башчысы Тедрос Гебрейесус маймыл чечек эпидемиясы жайылуусуна байланыштуу кайрадан глобалдык өзгөчө кырдаал жарыялаган.

Ал эми Кыргызстанда кырдаал туруктуу экендиги айтылган. Дарыгерлер маймыл чечек кандай илдет экендигин айтып, дарылоо жолдору боюнча кеңеш берген.