"Миңдеген тургундар эвакуацияланып, аба каттамдар токтотулду". Шанхайда эң күчтүү тайфун болду (видео)

Бүгүн, 16-сентябрда таңга маал Шанхайды 1949-жылдан берки эң күчтүү бороон катары сыпатталган "Бебинка" тайфуну каптады. Бул тууралуу чет элдик басылмалар жазышууда.

Кытайдын Метеорология башкармалыгы тайфунду 1-категориядагы бороон деп атады, эпицентрде шамалдын ылдамдыгы 151 чакырым саатка жетти. Бийлик тайфунду алдын алып, 15-сентябрда шаар жетекчилиги 400 миң адамды эвакуациялаган.

Шанхайда мындай ири кырсыктар сейрек учурайт. Тайфун шаардын калкына түздөн-түз коркунуч туудургандан тышкары, туристтерди да чочуткан.

Тайфундан улам токтотулган каттамдар менен поезддерден тышкары, шаардагы бир нече пансионаттар, анын ичинде эң ири Шанхай Дисней курорту, Цзиньцзян оюн-зоок паркы жана Шанхай жапайы жаныбарлар паркы убактылуу жабылган. Ошондой эле шаар жетекчилиги унаа жолдорду жаап, айдоочуларга 40 чакырым сааттан ашууга тыюу салды.